ജില്ലയിലെ റോഡുകളിലെ കുഴികള്‍ അടിയന്തരമായി അടച്ച്‌ അപകടാവസ്ഥ ഒഴിവാക്കണമെന്ന് ജില്ലാ കളക്ടർ അർജുൻ പാണ്ഡ്യൻ ബന്ധപ്പെട്ട വകുപ്പുകള്‍ക്കു നിർദേശം നല്‍കി.റോഡിലെ കുഴികള്‍മൂലം എന്തെങ്കിലും അപകടം സംഭവിച്ചാല്‍ ബന്ധപ്പെട്ട ഉദ്യോഗസ്ഥർക്കും കരാറുകാർക്കുമെതിരേ ദുരന്തനിവാരണനിയമം 2005ലെ സെക്ഷൻ 51 (ബി) പ്രകാരം നടപടി സ്വീകരിക്കും.കുറ്റകരമായ അനാസ്ഥമൂലം അപകടങ്ങള്‍ സംഭവിക്കുകയാണെങ്കില്‍ ബിഎൻഎസ് സെക്ഷൻ 125, 106 ഉള്‍പ്പെടെയുള്ള ശിക്ഷാനടപടികളുമായി മുന്നോട്ടുപോകുന്നതിനു പോലീസിനു നിർദേശം നല്‍കിയതായി കളക്ടർ അറിയിച്ചു. ജില്ലയിലെ റോഡുകളിലെ അറ്റകുറ്റപ്പണികള്‍ അടിയന്തരമായി പൂർത്തിയാക്കി അപകടാവസ്ഥ ഒഴിവാക്കുന്നതിനു നേരത്തെ ചേർന്ന ജില്ലാ റോഡ് സുരക്ഷാസമിതി യോഗങ്ങളിലും ജില്ലാ ദുരന്തനിവാരണ അഥോറിറ്റി യോഗങ്ങളിലും നിർദേശിച്ചിരുന്നു. എന്നാല്‍ പാലിച്ചതായി കാണുന്നില്ല.റോഡിലെ കുഴികള്‍ മൂലം നിരവധി അപകടങ്ങള്‍ റിപ്പോർട്ട് ചെയ്യുന്ന സാഹചര്യത്തില്‍ ജില്ലയിലെ എല്ലാ റോഡിലെയും അപകടകരമായ കുഴികള്‍ അടച്ച്‌ അപകടസാഹചര്യം ഒഴിവാക്കുന്നതിനു വേണ്ട നടപടികള്‍ അടിയന്തരമായി സ്വീകരിക്കണമെന്നും ജില്ലാ കളക്ടർ നിർദേശം നല്‍കി.
വളരെ നല്ല നടപടി ജില്ലയിൽ മിക്ക പ്രധാന റോഡുകളിലും കുഴികൾ ധാരളമുണ്ട്'
മറുപടിഇല്ലാതാക്കൂ